كتب – مدحت محي الدين :
وجهت الدكتورة أميرة حسن القائم بأعمال مدير مركز تدريب صحة المرأة بالجيزة نصائح يجب على مرضى السكرى اتباعها لصيام صحي فى شهر رمضان المبارك هذا نصها :
“عزيزتي المرأة، مرض السكر منتشر في العالم كله و على الرغم من إن مضاعفاته خطيرة إلا إن المضاعفات دي يسهل تفاديها بإذن الله بالإلتزام بالعلاج في مواعيده مع الأكل الصحي و قياس مستوى السكر بالدم و المتابعة المستمرة مع الطبيب المعالج و ممارسة الرياضة.
مريض السكر ممكن يصوم بأمان بالشروط الآتية:
أولاً _ يكون مستوى السكر في الدم منضبط لا عالي والا منخفض.
ثانياً _ضرورة قياس السكر الصبح بعد الإستيقاظ و بعدها ب٣ ساعات و قبل ميعاد الإفطار لأن ده أكتر وقت ممكن مستوى السكر فيه ينخفض عن المعدل المقبول.
ثالثاً _ مراعاة شرب المياه ( تقريبا من ٨ ل١٠ أكواب) بين الإفطار و السحور لتجنب الجفاف.
رابعاً _ يفضل تفطري على تمر لأنه بيرفع مستوى السكر بسرعة لكن راعي إنك ماتزوديش عن ٣ تمرات في اليوم،
وإحرصي إن وجبة الإفطار يكون فيها خضار كتير و بروتين و نسبة قليلة من النشويات، و ماتنسيش تقيسي السكر بعد الإفطار ب٣ ساعات.
خامساً _ ضرورة الإلتزام بالعلاج بين الفطار و السحور سواء كان فموي أو إنسولين و تقسيم الوجبات زي ماوصف لك الطبيب المعالج.
سادساً _ تجنبي تماما ممارسة الرياضة أثناء ساعات الصيام، تفضل ممارستها بعد الإفطار بساعتين.
سابعاً_ أحصلي على قسط كافي من النوم و لكن تجنبي تماما النوم قبل الإفطار مباشرة لأن ده أكتر وقت السكر ممكن يقل فيه.
ثامناً _ راقبي نفسك طول ساعات الصيام، لو حسيتي بدوخة، زغللة، هبوط، رعشة، تعرق، سرعة في ضربات القلب إفطري فورا.
متى يكون الصيام خطر لمريض السكر؟
_لو المريض عنده مشاكل في الكلى أو القلب أو الأوعية الدموية.
_لو المريض بيتعالج بمضخة إنسولين.
_الحامل المريضة بداء السكر.
_لو المريض مستوى السكر عنده دايما عالي أو منخفض و مااتظبطش قبل رمضان.
_لو المريض اتعرض لغيبوبة سكر خلال ٣ شهور قبل رمضان.
_النوع الأول من مرض السكر.
أخيرا ماننساش الكشف و المتابعة متوفرين بالمجان بمبادرة رئيس الجمهورية للصحة العامة ومن خلالها بيتم الكشف عن الأمراض المزمنة زي السكر و الضغط و الإعتلال الكلوي…إلخ و كمان بيصرف علاج للحالات . مع تمنياتنا بالشفاء العاجل و العافية للجميع بإذن الله ” .
