حالم برؤياكي
الكل باصرينك.. وحدايا لابسة نقاب
وبخيرك اتدفوا .. وتغطيني بتراب
بتدلعي ف الكل.. وتخليني عابر
بتقولي ماصبرتش.. ما اديني اهو صابر
ماهي هي كده بالعقل
هاحكي لمين حبي غير لاللي حبيتها
مخنوق بأشجاني مع اني خبيتها
ع الكل الاّها قوم هي قسمتها
ع الكل الاّيا جات عندي ودارتها
ليه تدوري فيا عذاب؟!
لما تغيب شمسك.. عيني بكت انهار
وف وسط غياباتك.. نورت عيني نهار
بتموجي ليا بنار!
عارفاني اني بخاف! ولا اني بعرف اكش
ده القلب ياماه شاف لساكي برده مشافش
ماهو نفسي انا اشوفك لأجل ما نعرفني
وبإيه ارد يا ناس لو حد وقفني!
ده بطاقتي تكسفني
الاسم: مسموشي
السن: عمر طويل بس معشتوشي
عملي ما يعرفنيش وكفوفي مشافوشي
واقامتي جبرية.. سجن مالوهش حيطان
ماهي دنيا عشرية.. الا مع الغلبان
فكرت نفسي شديد والزراعة لبلابه
قالتلي ياد يا عبيط ده العشرة كدابه
ولإمتى دعلك بس!
ماهو برده نفسي احس
اني كما حبيت واتخدت واتوديت
وف عينك الحاجه مدينة ايدي ولبيت
وياريتني بس ياريت، لخيبتي اتحبيت
ما هو فكري ده سذاجة
بس انتي معذورة.. م اللي جرى فيكي
لساكي مكسورة.. وانا بلوم فيكي
طاب ده الملامه تجوز بين ناس بيتحابوا
فما بالك أنه عتاب.. ولو أنه ورا قلبه
ليكي يا محروسة ياللي انتي أوطانه
وان كان ماهوش مرتاح فالصبر له أوانه
صابر على حكايتك
مش همه ايه فايتك
مستني ضحكايتك
فيبص ف مرايتك
يقدر يشوف نفسه
ويارب ما ف نفسه
تبقى كده نهايتك
