يعني إيه الأزهر الشريف؟ يعني المؤسسة الي خدمت الإسلام حوالي ألف سنة! يعني مكان اتبنى علشان يبقى معقل من أهم معاقل الشيعة فيشاء ربك إنه يبقى أهم مرجعية للسنة في العالم! يعني إنتاج علمي ضخم جدا لشيوخه وخريجيه يقدر بمئات الألوف من المراجع والكتب!
يعني أي حد في اي مكان في العالم يشوف شيخ لابس العمامة والكاكولا فيعرف على طول إنه أزهري واتعلم في مصر!
يعني عشرات الآلاف من الطلبة الوافدين من أكتر من 100 دولة بيدرسوا في الأزهر وبيرجعوا بلادهم قوة ناعمة لمصر وسفراء للأزهر ويبقوا قضاة شرعيين أو مفتيين أو دعاة وبعضهم بيكونوا وزراء للأوقاف أو وزراء للعدل وفيه منهم الي تولى رئاسة الدولة زي أمين عبد القيوم رئيس جزر المالديف وعدد من رؤساء دولة جزر القمر!
جامع الازهر الشريف
يعني رئيس إندونيسيا محمد ضياء الحق يتقال له من مستشاريه إن البروتوكول لا يسمح لك إنك تستقبل شيخ الأزهر في المطار لأنه على درجة رئيس وزرا فيصر برضه يستقبل الإمام عبدالحليم محمود بنفسه في المطار ويقولهم: العالم فيه رؤساء كتير ووزراء كتير لكن مفيهوش غير شيخ أزهر واحد… ويعني رئيس الشيشان الحالي يقود بنفسه السيارة لشيخ الأزهر الإمام الطيب ويطلب منه إنه يشرفه بالزيارة في بيته الخاص!
يعني الحصن الأول للغة العربية في العالم وأهم مؤسسة خدمت القرآن في التاريخ …. ويعني برضه أكتر مؤسسة حافظت على التراث العلمي للمسلمين!
يعني أول جمع صوتي للمصحف في العالم بصوت الشيخ الحصري وأول تفسير صوتي للقرآن في التاريخ على ايد الشيخ الشعراوي، يعني مصر فيها أعرق وأهم إذاعة للقرآن الكريم في العالم بسبب وجود الأزهر فيها!
يعني الأزهر هو المؤسسة الإسلامية الوسطية الأكبر في العالم؛ لأنه بيدرس المذاهب الفقهية الأربعة من غير ما يتحيز لمذهب الأحناف زي الأتراك أو لمذهب المالكية زي المغاربة أو لمذهب الشافعية زي اليمنيين. وكمان لأن الأزهر توسط في العقيدة ومقدمش العقل البشري على النص المقدس زي فرقة المعتزلة ولا عطل العقل في نظرته للنص الشرعي زي الفرق والطوائف المجسمة، فالأزهر احترم النص وأعمل العقل. وكمان هنلاقي الأزهر اهتم بالجانب الروحي والتربوي وعمل له مناهج وعلوم ومجالس لتزكية النفس وللذكر والإنشاد والابتهالات!
يعني فيه تقاليد وأعراف جامعية الأزهر الي أسسها في العالم وقت ما كانت أوروبا والغرب في العصور الوسطى المظلمة كانت مشاعل الأزهر العلمية بتنور في بلاد الشرق … ويعني مفيش جامعة إسلامية أو كلية شرعية في العالم الإسلامي -تقريبا- إلا لما شيوخ الأزهر درسوا لطلابها ووضعوا مناهجها الدراسية أو أشرفوا على وضع المناهج دي!
يعني لما والي مصر محمد علي قرر يعمل نهضة علمية حديثة في مصر استعان بعلماء الأزهر وسفرهم فرنسا علشان يدرسوا علوم الغرب ويرجعوا مصر علشان تستفيد من خبراتهم الي اكتسبوها في الخارج!
يعني جامعة القاهرة اتأسست على أكتاف علماء الأزهر الي كانوا بيدروسوا في كليات زي الحقوق والآداب ودار العلوم الي لغاية النهارده بعض أساتذتها متعلمين في الأزهر!
يعني فحول القراء في العالم زي الحصري والمنشاوي والبنا وعبد الباسط ومحمد رفعت ومصطفى إسماعيل والشعشاعي!
يعني عمالقة الإنشاد الديني والتواشيح زي النقشبندي وطوبار والبهتيمي والفشني!
يعني كتائب من الفقهاء الكبار زي العز بن عبد السلام وابن دقيق العيد وزكريا الأنصاري وابن حجر الهيتمي والرملي وخليل الجندي وعليش وحسنين مخلوف وأبو زهرة وجاد الحق وعطيه صقر
يعني كبار علماء التفسير زي محمد رشيد رضا والمراغي وطنطاوي جوهر ومحمود شلتوت وعبدالجليل عيسى والذهبي والشعراوي وسيد طنطاوي
يعني لما تدور على دور الأزهر في خدمة السنة النبوية هتلاقي أسماء كبيرة جدا زي ابن حجر العسقلاني والقسطلاني والعيني -وكلهم من أكابر شراح صحيح البخاري- وزي المنذري -صاحب الترغيب والترهيب- وزي جلال الدين المحلي وجلال الدين السيوطي والسخاوي وأحمد شاكر
يعني عظماء من المؤرخين زي الجبرتي والمقريزي
يعني فحول الأدباء زي المنفلوطي والمرصفي والزيات وطه حسين ومحمود شاكر
يعني أعلام التجديد ورواد النهضة الفكرية زي ابن خلدون وحسن العطار ورفاعة الطهطاوي وجمال الدين الأفغاني ومحمد عبده!
يعني أسماء كبيرة جدا في التصوف زي الشعراني ومحمد ماضي أبو العزايم وإبراهيم الدسوقي ومحمد زكي إبراهيم
يعني دور عظيم جدا لعلماء الأزهر في منظومة الوقف والعمل الخيري والخدمي، فهنلاقي بنك الزكاة والصدقات المصري بمشيخة الأزهر والبر والخيرات بوزارة الأوقاف ومؤسسة مصر الخير برئاسة مفتي مصر السابق الشيخ علي جمعه والجمعية الشرعية الي أسسها الشيخ محمود خطاب السبكي… وكمان هتلاقي كتير من أبناء الأزهر أعضاء في الجمعيات الخيرية ولجان الزكاة!
يعني مؤسسة “بيت العائلة” الي أنشأها الأزهر علشان تلم الشمل المصري وتواجه الفتنة الطائفية وتحافظ على النسيج الاجتماعي بمسلميه ومسيحييه!
يعني الموسوعية العلمية وسعة الاطلاع الي بنشوفها في نماذج كتيرة زي السيوطي الي مؤلفاته حوالي ألف كتاب ورسالة في علوم كتير زي النحو وأصول اللغة وأصول الفقه والتفسير وعلوم القرآن والحديث ومصطلح الحديث والتاريخ والسيرة والعقيدة… يعني شيخ الأزهر الدمنهوري الي له مؤلفات مهمة في العلوم الشرعية وغير العلوم الشرعية زي كتابه “عين الحياة في استنباط المياه” وده في الجيولوجيا، و”القول الصريح في علم التشريح ” وده في الطب، و”منهج السلوك في نصيحة الملوك ” وده في السياسة والأخلاق، و”الدرة اليتيمة في الصنعة الكريمة” وده في الكيمياء، و”إيضاح المبهم من متن السلم” وده في المنطق، و”إحياء الفؤاد بمعرفة خواص الأعداد” وده في الحساب، و”الأنوار الساطعات على أشرف المربعات” وده في الهندسة!
يعني كفاح ونضال ضد الاحتلال الفرنسي بقيادة عمر مكرم ابن الأزهر، وشهداء بالآلاف زي الطالب الأزهري سليمان الحلبي الي قتل كليبر.. يعني مظاهرات زي البركان كانت بتطلع من الجامع الأزهر ضد الانجليز.. ويعني برضه ثورة 1982م بقيادة أحمد عرابي ابن الأزهر وثورة 1919م بقيادة سعد زغلول ابن الأزهر!
يعني العز بن عبد السلام الي باع أمراء المماليك ودفع فلوسهم لخزينة الدولة علشان تجهز العتاد والسلاح لحرب التتار الي انتصرنا عليهم في عين جالوت..ويعني الإمام الخراشي الي كان أهل مصر بيستغيثوا بيه ضد ظلم الولاة ويقولوا يا خراااااشي!
يعني زمان جالنا ابن خلدون اليه من بلاد المغرب مخصوص علشان علوم الأزهر، وقال كلمة حلوة وعظيمة أوي “من لم ينزل القاهرة لم ير عز المسلمين”.. يعني في زماننا ده طالب أزهري من إندونيسيا بقوله: انتو شايفين الأزهر ازاي في بلدكم؟ فقالي: الأزهر ده عندنا كأن النبي هو الي بناه وكأن الصحابة هما الي بيدرسوا للطلبة فيه!
يعني مصر فيها الحضارة والآثار والأهرامات والنيل ورغم كده العالم عرف مصر بأنها “بلد الأزهر”…. يا ترى فهمنا دلوقتي يعني إيه الأزهر الشريف؟ وعرفنا ليه مصر بيتقال عنها بلد الأزهر؟ وعرفنا ليه خصوم الإسلام بيكرهوا الأزهر وبيحاربوه؟ علشان مصر من غير الأزهر زي الجسم من غير روح… أصل الأزهر ده تاريخ وأصالة وعراقة وعظمة ومجد وفخر للإسلام وعز للعروبة وقوة ناعمة كبيرة جدا لمصر!
