أنت حبيبي وبس
قصيدة للشاعر/ محمد الأمين البس
ياللي انت سامعني وبتحس
بكل نبضة قلب وحس
بحبك انت.. واخترتك انت
والدنيا صارت إنت وبس
********
حَلِّيت حياتي وأيامي
واتحققت بيك أحلامي
مابشوفش غيرك قُدَّامي
وآمالي صارت إنت وبس
*******”**
من يوم ما شفتك بعنيَّه
من يوم إيديك لمسوا إيديَّه
عاهدت ربي تكون لِيَّه
وتفضل انت حبيبي وبس
**********
لو رُحت آخر الدنيا معاك
ولا حد يشغل بالي سواك
لو كنت أنسى الروح أنساك
ياللي انت جوه الروح والحس
***********
نسِّتني هَم.تَعَبني سنين
خليتني ادوب أشواق وحنين
وكنت الاقي الحب دا فين ؟
لولا مشاعرك إنت وبس
**********
الحب ليه الناس أهانوه
عملوه كلام بس يغنُّوه
وفي الحقيقة خانوه ..ظلموه
فاكرينه كلمة وغنوة وبس !!
**************
لو أخلصوا كانوا اتهنوا
ونالوا كل اللي اتمنُّوا
وعاشوا بالحب وغنُّوا
مش هوَّه طبل ورقص وبس
**”*******
من غير ما أقولك واحكيلك
أنا ماشي على نور قناديلك
وف عز ليلي أناديلك
أتمنى أسمع صوتك بس
**************
خليك فاكرني ما تنساشي
بعدك حياتي ما تسواشي
واطلب عنيَّه ماتغلاشي
الدنيا عندي إنت وبس
************
أنا قلبي دايماً بيك مشغول
واسهر معاك.. والليل بيطول
وقلبي يحلف لك ويقول ..
والله إنت حبيبي وبس
