تحيا مصر
بحري قبلى
شرقى غربى
تحيا مصر
تحيا ليه…. ؟
علشنا احنا
ما احنا هيه
وهيه احنا
لما تحيا
نحيا بيها وتحيا بينا
قالى واحد. يابنى سيبك
قلت اسيبك لما ترجع تانى بلدك
تلقى بلدك فيها تحيا
قالى واحد ايه يهمك
قلت امك
مش شتيمه
امى وامك هى بلدك
لما تحيا نحيا بيها
لما تغرق نغرق احنا
قالى واحد ماانت فيها من زمان
قلت راجل وابن راجل مش جبان
قالى واحد حسوا بينا
قلت بينا
ما انا منكم وانتم منى
قالى منا متأكد انت. !
لما تاخد قوت عيالى
لما تاخد كل مالى
برضه منا ونور عنينا
قلت حالك هو حالى
حتى بيتى وبيت عيالى
بس برضه هى بلدى
احيا فيها وتحيا فى
مش هكون فى يوم عليها
قالى واحد مش هقول تحيا مصر
طول ما فيه قانون جبايه
طول ما فيها الخوف معشش
لما اصحى لشغلى بدرى
أجرى الحق يومى بدري
ألقى شرطى يقولى شكلك مش عجبنى
دى ملامحى مش ملامحك
ربى هو اللى خلقنى
يقولى اسمك. ؟
أقوله طارق.
يقولى. قرب انت منهم
انا منك وانت منى واحنا منها
بس انت حس بينا
انا منها وأسمى طارق مش طوارئ
يعنى اسمى لو مجاهد
ابقى طالب من الطوالب
مش هقول تحيا مصر
الا لما تحيا فينا وتحيا بينا وتحيا لينا
قلت عندك
مش بايدى أو بايدك
هى فعلا عيشه فينا
مش هقول غير تحيا امى
تحيا بنتى
تحيا ولدي
همه دول كل وطنى
مش هقول غير تحيا بلدى
مش هقول غير تحيا مصر
